|
UMKHUSELI WOLUNTU  uLawrence Mushwana, uMkhuseli Woluntu Iinkonzo zoMkhuseli Woluntu zifumaneka simahla kwaye zivuleleke kumntu wonke. Xa ufaka isikhalazo kwi-Ofisi yoMkhuseli Woluntu, abasebenzi bayo baza kuphanda loo mba yaye ukuba eso sikhalazo siqinisekisiwe, baya kuzama ukuyilungisa loo meko. UMkhuseli Woluntu ujongana nezikhalazo ngendlela eyimfihlelo. UMkhuseli Woluntu angawaphanda amagosa karhulumente kulo naliphi na inqanaba, kuquka awesizwe, awamaphondo, kwanabaphathi basekuhlaleni kwanabani na owenza umsebenzi woluntu ofana: - nomqeshwa wombuso
- ipolisa (Unakho nokuqhagamshelana ne-ICD)
- igosa lezolonyulo
- amaziko angekho phantsi kukarhulumente ngokugqibeleleyo, afana noEskom okanye uTelkom
- amabhunga angumvuka wemithetho karhulumente ethile, Yoluntu amabhunga abekwe yimithetho ethile, efana neBhunga Eliphanda Ngenzululwazi Yoluntu (iHSRC ngamafuphi) okanye iBhunga Elenza Uphando Ngenzululwazi Noshishino (iCSIR ngamafuphi).
UMkhuseli Woluntu unoxanduva lokujongana nezikhalazo: - ngokusetyenziswa kakubi kwamagunya
- ukuziphatha okucalulayo, okungafaniyo, okungenankathalo, nezinye nje iindlela zokziphatha ezingamkelekanga
- ukulibaziseka ngaphandle kwezizathu ezibambekayo
- ukungahlonitshwa kwamalungelo oluntu (usenakho nokukrweca iKomishoni Yamalungelo Oluntu yoMzantsi Afrika)
- ulawulo olunamakhwiniba
- ukungathembakali okanye ukusebenza ngendlela engamkelekanga ngeemali zoluntu
- ukuzityebisa ngendlela engeyiyo
- ukuzifumana ukwindawo ekuncedayo ngokungalunganga.
UMkhuseli Woluntu akaziphandi ezi ntlobo zilandelayo zezikhalazo: - izigwebo nezigqibo zenkundla
- iintshukumo zabucala ezenziwe ngabantu abazimeleyo
- iinkampani zabucala
- oogqirha namagqwetha abucala.
INDLELA YOKUFAKA ISIKHALAZO KUMKHUSELI WOLUNTU Ukuba isigqibo esikhetha icala esithatyathwe ligosa likarhulumente siyakuchaphazela, kufuneka uqale: - Uthethe neloo/loo magosa achaphazelekayo, ze
- Ubhalele umntu igosa/amagosa lawo aphantsi kwakhe, ze
- Ukrwece iLungu lakho lePalamente yesizwe okanye ke yephondo, ze
- Ubhalele Umkhuseli Woluntu.
Ukuba uthi ubhalele uMkhuseli Woluntu kufuneka ufake nezi nkcukacha zilandelayo: - Ubume besikhalazo sakho.
- Imbangi nemvelaphi yesikhalazo eso.
- Izizathu ezibangela ukuba uzive ufuna ukuba isikhalazo sakho siphandwe nguMkhuseli Woluntu.
- Amanyathelo osele uwathabathile ukuzama ukusombulula loo ngxaki ngokwakho (ukuba ebekho). Kufuneka ukhankanye amagama amagosa obusoloko usebenza nawo kule nyewe, iintsuku, nokuba kwaphela kusithiwani na. Iikopi zayo nayiphi na imbalelwano phakathi kwakho naloo magosa kufuneka zincanyathiselwe kule ncwadi yembalelwano.
- Inombolo yomnxeba apho unokufumaneka khona, ukuba ikho onayo.
- Kumaxesha athile uMkhuseli Woluntu unokufuna uthethe phantsi kwesifungo phambi kokuba aqalise ngophando lwakhe.
Ukuba awuqinisekanga ukuba ingxaki yakho ngumba uMkhuseli Woluntu anokuyiphanda na, okanye ukuba awukwazi ukubhala, ungatsalela umnxeba iofisi yoMkhuseli Woluntu. Apho kukho abasebenzi abaqeqeshiweyo abaza kuphulaphula isikhalazo sakho, sisincinci sisikhulu, ze benze uphando. Usenakho nokundwendwela le Ofisi ukuze nibe nodliwano-ndlebe okanye indibano, ukuba ungathanda. Kungcono ubhale kuqala ze ucele udliwano-ndlebe kuloo ncwadi yembalelwano. IINKCUKACHA ZOQHAGAMSHELWANO I-Ofisi Eyintloko
Private Bag X677, ePitoli, 0001
Sinodale Centre, 228 kwiSitalato iVisagie, ePitoli
Inombolo Yomnxeba: 012 322 2916
Inombolo Yomnxeba Ongahlawulelwayo: 0800 112 040
Inombolo Yefeksi: 012 322 5093
I-Ofisi yePhondo leNtshona Koloni
138 kwiSitalato iAdderley, eKapa
PO Box 712, eKapa, 8000
Inombolo Yomnxeba: 021 423 8644
Inombolo Yefeksi: 021 423 8708
shamielah@pprotect.pwv.gov.za UKUNIKEZELA INGXELO NGORHWAPHILIZO: KURHULUMENTE WEPHONDO LENTSHONA KOLONI Naluphi na urhwaphilizo kuRhulumente wePhondo leNtshona Koloni lungaxelwa kwiCandelo iForensic Audit elikwiSebe leNkulumbuso. Olu rhwaphilizo luquka amaxesha obuqhophololo, ubuqhetseba, ubusela nokusetyenziswa ngendlela engeyiyo kwempahla karhulumente. Urhwaphilizo lungaxelwa umntu engazichanga ukuba ungubani na ngomnxeba, iposi, ifeksi okanye iemail ngokuthunyelwa kwa:
33 Church Street Chambers, kwiSitalato iChurch
PO Box 659, eKapa, 8000
Inombolo Yomnxeba Ongahlawulelwayo: 0801 226 545
Inombolo Yefeksi: 021 426 2649
svaarde@pgwc.gov.za Ukuze uqinisekise ukuba imiba ingaphandwa kakuhle, ulwazi oluneenkcukacha ezipheleleyo ngolo rhwaphilizo uluxelayo luyafuneka. Ukuba ufuna ukwenza ingxelo, kufuneka uzame ukunikezela kangangoko ezi nkcukacha zilandelayo: Urhwaphilizo - Lukumila kunjani (umzekelo: ubusela, ubuqhophololo, ubuqhetseba)?
- Lwenzeka njani, phi?
- Ingaba le yingxaki eqhubekekayo futhi kusisithuba esingakanani iqhubekeka?
- Unabo nabuphi na ubungqina ngolu rhwaphilizo? Umzekelo, xa unikezela ingxelo ngobusela, ingaba uyayazi impahla ebiweyo ukuba ifihlwe phi?
- Ingaba ukho omnye umntu owaziyo ngolu rhwaphilizo futhi angafuna na ukunikezela ubungqina kumagosa enza uphando?
- Ungakwazi ukwenza ingqikelelo yelahleko ngokwezimali ngolo rhwaphilizo?
Amagosa arhanelelekayo - Ngoobani amagama amagosa karhulumente arhanelekayo, asebenza kweliphi iSebe yaye aphethe ziphi izikhundla apho?
- Ngoobani amagama amanye amagosa achaphazelekayo?
- Ingaba la magosa arhanelelekayo akhe abandakanyeka kwezinye izenzo zorhwaphilizo ngaphambili?
Ummangali- Wawukhe wayixela le nto ngaphambili? Ukuba kunjalo, kubani yaye kwathatyathwa manyathelo mani?
- Wawukho ngexesha lokwenzeka kolu rhwaphilizo, okanye ukuba akunjalo, wafumanisa njani ngalo?
- Ingaba ukulungele na ukuhlanganisa ingxelo efungelweyo ze unikezele nobungqina?
|
